Sabes que te estás volvendo sueco cando...

Tras dous meses e medio por terras escandinavas, creo que xa estou en posición de poder xulgar dende fóra a "vida sueca", así como a maneira de ser de moitos dos seus habitantes. Aquí deixo esta listaxe que elaborei a partir de cousas atopadas na rede e que, segundo a miña experiencia, poden resumir en grande medida e a modo de broma a forma de ser desta xente da que, sen dúbida, temos moito que aprender (tamén teñen defectos por suposto, moitos!)...

Sabes que te estás volvendo sueco cando...

• Tes serias dificultades para cruza-la rúa co semáforo de peóns en vermello; incluso non circulando ningún coche.
• Sénteste mal por tirar algo á papeleira que podería ter sido reciclado.
• Camiñando pola rúa só ves mulleres loiras ou morenas con raíces rubias.
• Atopas perfectamente normal ter que ir a unha tenda especial propiedade do goberno (System Bolaget) aberta só ata as 6 da tarde para mercar calquera tipo de bebida alcólica.
• Nunca usarías os transportes públicos sen un billete válido.
• Nunca na túa vida copiarías nun exame, pois "iso sería facer trampas e non aprenderías nada"
• Cres que a pre-party é moito máis divertida cá posterior sesión de discoteca
• Ves perfectamente normal pagar máis do 50% do teu soldo en impostos.
• Sínteste moi mal estando na casa se brila o sol fóra.
• A ineficiencia cabréate moito.
• Quitas sempre os zapatos ó entrar na casa e non entendes por qué a xente non sueca non o atopa gracioso.
• Pasarías todo o traxecto do autobús de pé antes de molestar a alguén que ten a súa mochila ocupando o ultimo sitio libre.
• Úneste con moito gusto a unha conversación sobre o tempo.
• Cabréaste cando hai xente parada no lado esquerdo dunha escaleira automática.
• Planeas cada segundo do día, incluso as túas visitas ó baño.
• Respondes ó teléfono dicindo o teu nome.
• Rematas tódalas chamadas telefónicas con “puss puss", e non entendes por qué a xente anglofalante que te rodea te mira con cara rara.
• Estás sempre pedindo desculpas, incluso sen saber moi ben por qué.
• Estás acostumado a que polo menos unha muller comente os partidos de fútbol tal e como dicta a lei.
• Proclamas ben alto que a auga da billa da túa casa é moito mellor que calquera auga mineral embotellada vendida no supermercado.
• Prefires sentarte nunha terraza cunha manta e debaixo dunha estufa que dentro dun bar, aínda que a temperatura ambiente sexa de “menos algo”.
• Atopas que a xente doutras culturas fala moi alto.
• Non consideras o silencio coma un problema. É divertido!
• Cres que construir casas de ladrillo é unha tontería. A madeira é unha ganga!
• Cabréaste se as cousas non están no seu sitio e correctamente etiquetadas.
• Un sandwich consiste para ti nunha soa rebanda de pan.
• É aceptable comer ás 11 da mañá.
• Aceptas que terás que facer cola para coller un número que che permita facer cola.
• Cabréaste moitísimo se o autobús chega dous minutos tarde.
• Cres que ir á sauna espido cunha manada de extraños é unha parte necesaria da túa vida diaria.
• Sempre te estás desculpando polo teu acento/gramática/escritura en inglés, incluso sendo consciente de que falas mellor que algúns nativos.
• Cambias de sueco a inglés cando alguén non-sueco entra pola porta e continúas falando inglés incluso cando esta persoa deixa o lugar.
• Cres que dicindo dúas veces a mesma cousa soará mellor: “Hej Hej!”, “Nej men Nej men”, "Tack tack", etc.
• Confías en IKEA máis ca no teu propio goberno.
• Sínteste incómodo cando a caixeira do supermercado che pregunta “Que tal?” pois pensas… ”Por que quererá saber esta muller sobre a miña vida privada?”
• Póñenseche os ollos coma platos ó darte conta de que en calquera outro país se pode mercar alcol no supermercado e aínda por riba moito máis barato.
• Cando a primeira cousa que preguntas cando un amigo volve de viaxe é: "que tal o tempo?"
• Cando tornas tolo ó enterarte de que no país ó que vas ir de viaxe non se pode bebe-la auga da billa.
• Só eres capaz de iniciar unha conversación por ti mesmo e abrirte á xente estando borracho.
• Interésaste máis pola porcentaxe en alcol que pola bebida en si mesma.
• Cres que ir a un bar a tomar algo é unha perda de tempo se non te vas emborrachar.
• Eres considerado un alcólico se bebes durante a semana, pero se non saes “a muerte” a fin de semana, es raro.
• Consideras "normal" coñecer a unha moza nun pub, acompañala á súa bicicleta e pedalear xuntos cara a súa casa.
• Tomas 3 ou 4 cafés ó día.
• Prendes velas cando tes visitas, incluso brilando o sol fóra.
• Tes unha asignatura no colexio dende os 12 anos na que aprendes a cociñar, pasa-lo ferro, e demais tarefas domésticas.
• Nunca más intentas pagarle la cena a una chica en una cita, por miedo a un ataque acusándote de machista.
• Pagas todo con tarxeta, incluso se se trata só dun chicle.
• O dentista, o transporte público, o comedor do colexio e moitas cousas máis son gratis ata remata-lo instituto; e ó entrar na universidade recibes un soldo de aproximadamente 400€.
• Atopas completamente normal que unha persoa estranxeira poida sacar unha carreira no teu país sen cursar ningunha asignatura en sueco e tanto o teu título coma o del sexan o mesmo.